今日係9月18日,亦係「九一八事變」發生91周年。當年日軍响中國犯下好多戰爭罪行,而响九一八事變發生91年周年之際,中央電視台就推出一個節目,公布侵華日軍犯下戰爭罪行嘅一大罪證。
响節目當中,就有講偽滿皇宮博物院課題組於2018年開始搜集侵華日軍第100部隊進行人體試驗嘅罪證。經過四年研究整理,完整解密咗1949年伯力審判錄音檔案,其中有關侵華日軍100部隊有預謀咁準備同實施細菌戰,更加以戰俘開展人類活體解剖實驗。據了解,當年侵華日軍响長春建立第100部隊同第731部隊,731部隊進行嘅係人體實驗,100部隊就以家畜、植物為主要研究物件,但同時又會以活人當作實驗品,進行細菌傳染實驗。
伯力審判係1949年12月25日至30日,由蘇聯政府响伯力對前日本陸軍軍人就戰爭期間實施細菌戰罪行而進行嘅審判,亦係人類歷史上第一次針對細菌戰罪行作出嘅審判。研究團隊今年完整解密伯力審判錄音檔案,成為咗侵華日軍利用戰俘開展活體解剖實驗嘅罪證。
原圖:CCT