繼續同史友們介紹我國最新嘅考古發現,古代嘅戰爭就已經識得以城池作為據點展開攻防戰,之不過史友們又有冇諗過到底古代先民會有呢啲構想出現呢?以下嘅呢個發現可能就畀到唔少啟示畀大家。
近日山西考古研究院就公布咗一項最新考古成果,研究院近日就喺黃河畔關口城市碧村遺址發現到一個具有內外雙重城牆嘅石城聚落。根據考古團隊研究,呢個石城係運用南、北、西三面環河臨溝形成天險,而喺遺址中部、東部都各有一道城牆、城門控制通道。至於喺外城門,就有三個大型墩臺圍成一個「品」字型,兩側銜接障牆。
好難想像呢種咁複雜嘅設計會係處於距今4000年嘅龍山時代遺址,而研究院華夏文明研究所所長張光輝就表示,呢個遺址佔據控扼黃河與蔚汾河關口,為研究認識中國史前及先秦城門布局提供重要案例。
原圖嚟自網絡