以往阿史都同史友們介紹過,雖然清朝滅亡咗,但當時民國政府仍然為溥儀皇室以及遺老遺少提供優待政策,唔單止畀佢哋繼續留喺宮中居住,甚至仲每年提供四百萬兩畀佢哋繼續過奢華嘅生活。
之不過,隨住1924年甲子兵變,末代皇帝溥儀被正式趕出紫禁城,而早前嘅優待政策其實早喺民國政府財困之時就已經無法持續,咁到底點解溥儀喺宮外都仍然可以過住奢華嘅生活呢?咁就同佢嘅細佬溥傑有關喇!
其實溥儀被趕出宮之時,基本上都係「淨身出戶」,而佢喺1925年就去到天津生活,分別就住過喺「張園」以及「靜園」當中。雖然呢兩座建築比唔上故宮,但作為當時天津租界內嘅洋樓,絕對唔算係差。而喺天津嘅生活,溥儀嘅《我的前半生》就描述自己可以「在園中騎車運動,薄暮乘汽車出園,赴新購房地,少時即返」,真係相當巴閉。
點解離開咗皇宮嘅溥儀生活仍然咁巴閉呢?除咗有皇室固有資產之外,其實溥儀喺宮中嘅時候就已經叫內務府選定一啲最好嘅字畫,以「賞財」為名畀自己嘅細佬溥傑帶出宮,當中就有東晉書法家王羲之、王獻之父子的《曹娥碑》、北宋史學家司馬光《資治通鑒》原稿,以及北宋畫家張擇端《清明上河圖》等等,全部都係國寶中嘅國寶,價值不菲!
原圖嚟自網絡