尋日提過上水雙魚河馬會會所大門嘅大石門,原本係位於銅鑼灣,後嚟怡和捐咗俾馬會先至响新界出現。而响大埔一個地方,亦有一個從市區搬到去新界嘅「建築」,史友們又估唔估到阿史想講邊個呢?
無錯喇!就係大埔嘉道理農場裡面嘅四條石柱。响農場裡面,有一個著名景點四柱擎天,就係四支大石柱竪立响山頭,咁點解無啦啦會有四支石柱响度呢?其實呢幾支柱係前香港中央郵政總局嘅門柱。由於中環响上世紀六七十年代大規模改建發展,郵政總局為配合地鐵工程响1976年拆卸,後嚟梁潤昌先生從拆卸工程公司手上取得(應該係買咗)呢幾支石柱,再送俾摯友賀理士嘉道理爵士,嘉道理爵士就將石柱放置响嘉道理農場。所以話,嘉道理農場呢四支石柱,成為中環發展嘅另類見證。
原圖:hkmemory.hk