上次介紹咗古代嘅人唔多想被貶去海南島，今次就要講講一個古代被貶到當地嘅名人，佢就係宋代文人蘇軾即蘇東坡。
蘇東坡嘅文學作品，得以流傳後世之餘仲有好高嘅文學地位，之不過，佢一生仕途就非常之差，仲先後多次被貶。因為當時嘅佢，响朝廷上避唔過黨爭，亦成為黨爭下嘅犧牲品。宋哲宗紹聖年間，章惇、安燾執政，彈劾被歸類為舊黨嘅蘇東坡，被宋哲宗貶謫至惠州，雖然已經被貶至廣東一帶，但佢嘅政敵就無放過佢，於是章惇上奏宋哲宗，指蘇東坡响惠州作詩諷刺朝政，結果宋哲宗下旨再貶蘇東坡至海南島嘅儋州。
當時蘇東坡已年屆60歲，再從惠州至雷州半島渡海登上海南島，响儋州任官幾年。後嚟到咗宋徽宗時期，向太后垂簾聽政，下詔讓蘇東坡北還。可惜嘅係佢年事已高，北返途中不幸死响常州，享年65歲。
原圖嚟自網絡