如果史友們本身係中國書畫迷，可能大家都對乾隆呢位帝皇比較有意見，事關呢位「印章狂魔」每逢見到鍾意嘅書畫作品，都會毫不猶豫咁蓋上自己收藏嘅印章，某種意義上都係對書畫嘅一種破壞。咁問題嚟喇，既然乾隆對印章收藏咁痴迷，到底佢一生有過幾多枚印章呢？
喺歷史上，其實乾隆本身就係一位文物古董、奇珍異寶嘅收藏家，歷朝歷代唔少珍貴嘅作品都曾經落入佢手中，連「印章」都係佢收藏品之一。據統計，連同大大小小、形狀各異、刻有漢、滿、蒙文嘅印章，乾隆一生係擁有過1,800枚印章，呢個數字對大家嚟講都係一個天文數字。收藏得咁多「印章」，乾隆自然就有啲奇怪嘅癖好，就係為作品蓋上印章。
其實呢種風氣早喺宋代之前就出現，而嚟到乾隆嘅時候，一幅好嘅作品唔單止會畀佢蓋滿印章，甚至有時仲會題詩，就好似王羲之《快雪時晴帖》，乾隆就喺上面寫下5首題詩，而同佢有關嘅題字、作畫喺呢幅作品上仲多達70幾處，真係估佢唔到！
原圖嚟自網絡