繼續同史友們介紹我國最新嘅考古發現，要了解一個朝代嘅經濟體系以及其發展，最直接就係發掘到一個鑄幣廠遺址，但其實呢類咁有價值嘅遺址並唔容易保留到落嚟。之不過，我國嘅考古學家近日就喺兆倫鍾官鑄錢遺址有突破性嘅發現！
兆倫鍾官鑄錢遺址位於陜西省西安市西鹹新區，喺西漢時期呢個地區就係屬於上林苑。咁到底呢個遺址有咩重要價值呢？原來喺鑄幣歷史最鼎盛嘅漢武帝元鼎二年（前115年）至王莽末年（公元23年），呢個遺址係作為國家鑄幣中心持續連作超過一百年，並且仲經歷過中國歷史上漢武帝統一鑄幣權、王莽託古改制兩個重要嘅幣制改革階段，所以本身單係呢個遺址就已經極具考古以及歷史價值。
而最重要嘅係，喺2015年12月開始，我國嘅中國社會科學院考古研究所漢長安城工作隊與西安市文物保護考古研究院聯合組成考古隊對呢個遺址進行考古勘探，過程中唔單止發現到過百座房址、窯址、井、磚池等建築，仲搵到大量錢範，由「五銖」、「大泉五十」、「小泉直一」、「契刀五百」、「一刀平五千」等都一應俱全，係考古史上極難得嘅發現！
原圖嚟自網絡