前個排阿史睇返廿幾年前個套《包青天》,其中一集就講一位柴家小王爺作惡多端,但因柴家得到歷代皇帝關照所以連包青天都無佢辦法,最後呢位小王爺竟然係「俾天收」,個天出連續閃電將佢劈死。
响唔少章回小說當中,都會提及响北宋時期柴家後人得到皇室關照,甚至話有免死金牌,咁實際又係點呢?其實趙匡胤成功取代後周政權後,對於後周皇室都算做足門面功夫。據《宋史》所載:「其封周帝為鄭王,以奉同嗣,正朔服色,一如舊制。」之後佢下詔於周太祖、世宗陵寢側各設廟宇塑像,而後嚟亦將周恭帝葬於順陵。呢位後周恭帝,就係八歲「禪讓」咗皇位俾趙匡胤個位。
至於小說裡講到柴家顯赫,主要係參考南宋陸游《避暑漫抄》中關於「太祖碑誓」記載,呢塊碑相傳宋太祖趙匡胤在太廟裏立下誓碑,命令子孫為皇帝者,要優待前朝宗室之後裔,且不得濫殺士大夫與上書言事之人。後嚟因靖康之難,本來藏於太廟之門嘅碑先得以被百姓見到,碑上就寫住:「誓碑高七、八尺,闊四尺餘,上刻誓詞三行:一為『柴氏子孫有罪不得加刑,縱犯謀逆,止於獄中賜盡,不得市曹行戮,亦不得連坐支屬』;一為『不得殺士大夫,及上書言事人』;一為“子孫有渝此誓者,天必殛之。」雖然後世有人質疑呢塊碑係咪真實存在過,但宋朝趙氏厚待柴家呢個印象就變得根深柢固。
原圖:《兵權》劇照
評論:
共0 條評論