早排阿史就同史友們介紹過朱元璋為人心狠手辣，只要係佢認為有機會危害到朱家江山嘅人，就算係開國功臣佢都不惜會剷除。一個疑心咁重嘅人物，到底又點解會收養二十幾個養子呢？阿史今次就同大家講一講啦！
其實自古以嚟武將都會有收養義子嘅習慣，簡單嚟講都係為咗培養自己嘅勢力，咁朱元璋收養義子又有冇咩特別原因呢？咁就要由佢所收養嘅人開始講起！朱元璋所收養嘅義子一般分成三類，其一就係佢嘅侄甥，當中代表人物就係外甥李文忠，佢喺19歲之時就已經領兵作戰，率軍平定江南，出征北元，立咗唔少戰功，及後仲被賜姓朱。
其二就係戰爭當中嘅孤兒，喺早年征戰嘅時候朱元璋就收養過孤兒沐英，同時賜姓朱，呢位養子喺18歲之時就已經憑武藝高超、謀略過人成為軍中指揮使。而最後一類就係部下嘅後代，呢類義子就係朱元璋為安撫部下而認，例如就有滁州守將何世隆孫子何文輝，成為養子嘅佢就曾經平定江西、福建、陝西等戰事，同樣立下唔少戰功。
睇到呢度，可能唔少史友都明白，朱元璋憑住呢啲「父子情」，成功令到呢班「朱元璋之子」為求報恩而喺戰場上奮勇殺敵，同時亦都抑制住身邊嘅其他將領，作用重大。之不過，喺明朝建立之後，呢班「朱元璋之子」就被改回原姓，「父子式」嘅政治關係亦都隨住朱元璋親生兒子出生而告終。
原圖嚟自網絡