今時今日去到內地各大城市，都好容易坐到地鐵，好似响北京就有成十幾地鐵線，真係睇見都頭暈。內地發展地鐵呢種交通系統，係到九十年代尾開始先大規模發展起嚟，响九十年代就只有個別城市有地鐵。之不過，原來內地城市出現地下鐵路，比香港出現地鐵時間仲要早。
北京地鐵出現係响1971年，呢個工程係响上世紀五十年代提出、六十年代修建，路線自高井站至北京站。而興建地鐵呢個構思，除咗係作為大型運輸公共交通系統外，仲有一個當作防空洞嘅功能，呢個其實係五十年代蘇聯專家嘅意見。而响北京地鐵開始運營時，係作為戰備工程，所以只有擁有工作單位介紹信嘅人先可以參觀乘坐。直到文革過後，北京地鐵先逐步供一般老百姓乘搭，後嚟更落成繞二環嘅二號線，成為北京市一個重要城市標誌。
時至今日，北京嘅地鐵線已經超過20條，範圍更去到六環以外嘅地方，只可以話發展真係快。
原圖嚟自網絡