【焦點new史】印度昔日被英殖民近百年 大半世紀後有後裔做英首相
近日英國政局迎來翻天覆地嘅轉變，隨住卓慧思辭任保守黨黨魁後，辛偉誠（Rishi Sunak）當選英國執政保守黨黨魁並且將會正式成為首相，成為英國史上首位非白人嘅印度裔首相。
由印度裔嘅人出任英國首相，可能呢件事喺18世紀嘅英國以及印度從來都冇人會諗過。事關英國喺1858年至1947年間就對印度實施咗接近百年嘅殖民地統治，期間憑住東印度公司可觀嘅軍事力量壟斷當地貿易、洗劫財富並且強逼印度農民以極低報酬勞動再收取雜稅。
喺英國人統治之下，英國人經濟管理政策失誤就造成印度遭遇饑荒、國內貿易受到限制，通貨膨脹導致食品價格飛漲。1876年－1878年印度大饑荒以及19世紀後半期孟加拉饑荒就分別造成接近千萬人口死亡。而喺1919年，英國軍隊甚至向數千名示威民眾開火，亦即係史稱札連瓦拉園（Jallianwala Bagh）慘案嘅大屠殺。
而喺英國人決定離開之時，「印巴分治」嘅決定更加係造成現今唔少苦難嘅開端，所以印度昔日被英殖民近百年後，大半世紀後有後裔做英首相真係令人感觸。
原圖嚟自網絡