史友們見到呢張圖,就知道係昔日香港一個掠影,不過大家可能見到個城樓加埋人力車,就覺得會唔會係宋城之類嘅景點。其實相中呢個地方,係响九龍嘅佐敦。
相中呢個地方,其實係九龍佐治五世紀念公園。公園响1940年8月興建,並於1941年6月建成,係當時九龍最具規模嘅公園。呢個公園其中一個特色就係有一個中國牌坊式城門,此外公園裡面仲有仿中式園林設計,响當時嚟講都算相當有心思。不過,公園啟用半年後香港就淪陷,公園响三年零八個月日治時期受到嚴重破壞,直至1954年先修復完成重新開放。
至於公園點解多人力車呢?據一位油麻地老街坊講,話當時個頭附近係旺區,人力車就好似依家的士咁,就係咁簡單。
原圖嚟自網絡