最近阿史同一位小朋友溫書,估唔到小學就要學唐太宗被外族尊為天可汗。小朋友自然唔多明乜嘢係天可汗,不過話時話,唐太宗幾時被尊為天可汗呢?
據《資治通鑑卷一百九十三》所載,唐滅東突厥後:「四夷君長詣闕請上為天可汗,上曰:『我為大唐天子,又下行可汗事乎?』群臣及四夷皆稱萬歲。是後以璽書賜西北君長,皆稱天可汗。」
其實唐太宗之所以被尊天可汗,同當時中原同外族形勢好有關係。响公元六世紀,漠北出現咗突厥汗國,而响公元583年東西突厥分裂,東突厥建立,而東突厥對隋皇朝以及唐皇朝帶來唔少困擾。隋末唐初,東突厥強大,甚至割據北方嘅群雄都同突厥有所聯繫,包括李淵。佢响太原起兵時,都要向突厥稱臣。而响唐朝建立後,突厥經常南下騷擾,甚至試過打到距離首都長安只有40里嘅涇陽。李世民被迫講和,渭水之盟後突厥亦退兵。
不過,唐太宗忍咗東突厥都唔係好耐,响公元629年就派兵打東突厥,仲响公元630年消滅咗東突厥。就係因為唐消滅咗東突厥呢個外族最大勢力,所以其他外族都驚,因而尊唐太宗為天可汗。
原圖嚟自網路