現代科技發達,近乎每日都有各式各類嘅考古發現,好多事物可能大家都見慣不怪,但其實即使放到嚟今時今日,阿史將要介紹嘅呢件文物都照樣可以震驚大家!
中華民族一直以嚟都以「龍的傳人」自居,咁到底呢種講法又係喺幾耐之前開始呢?呢件號稱「中華第一龍」嘅文物可能就畀到唔少研究方向畀學者們喇!早喺1987年,河南省濮陽市為解決工業、城市居民用水,就決定喺濮陽縣城西南處修建供水調節池,但喺過程中就意外發現到一處早期仰韶文化遺址。
考古團隊喺發掘之時,就喺呢個面積廣大嘅遺址發現到上下四層嘅文化層,其中最底嘅一層時期更加係距今7800-8000年,就算係最上一層都係距今4800餘年。講到當中最精彩嘅發現,自然就係距今6800-6000年,仰韶早期文化層。喺呢個文化層45號古墓葬中,考古團隊就喺一個壯年男性嘅骨架旁邊搵到用蚌殼精心擺塑嘅龍虎圖案,其中龍更係長達1.78米,高0.67米,昂首弓身長尾,前爪扒、後爪蹬,狀騰飛,因而被稱為「中華第一龍」。
呢次「中華第一龍」嘅發現唔單止轟動學術界,更加引嚟外國媒體關注,甚至考古學界當時仲龍為墓主人很大可能就係五帝之一嘅顓頊,呢條龍就係「乘龍昇天」嘅真實寫照咁話!
原圖嚟自網絡