相信史友們都知道，依家深圳一帶地區以前屬於寶安縣，而寶安呢個地名更有一千六百幾年歷史，响墳場見到先人啲墓碑唔少都會寫祖籍寶安。咁史友們又知唔知，寶安呢個地名係點嚟嘅呢？
寶安於1600多年前即東晉時期正式立縣，至於個名嘅由來源於依家樟木頭一帶有一座銀礦，因而稱為寶山。《輿地紀勝》有載：「舊以山有寶，置場烹銀，名石甕場，今山中銀滓猶存。」就係因為呢座寶山，所以啲人就覺得呢個地方「得寶而安」，故得「寶安」之名。到咗唐代寶安改名為東莞，縣城遷至今日嘅東莞市莞城。到咗明代萬曆年間，東莞置新縣，取名為新安，寓意「革故鼎新，去危為安」。到咗民國時期新安又復稱寶安，之後到咗1979年寶安縣改設深圳市，寶安就成為深圳市下轄嘅行政區名。
原圖嚟自網絡