最近睇返南北朝時代中外交通史,見到中國禪宗始祖達摩原來係由海路到廣州再進入中土,證明咗隋唐以前中國嘅海上交通其實相當發達。講到達摩,响宗教界以至民間傳說都有好多關於佢嘅故事,當中就有同梁武帝對話嘅經典故事。
响唔少典籍當中,都有提及過達摩獲梁武帝召見嘅故事。今時今日佢哋兩個嘅對話就多咗唔少後世加入嘅內容,咁最初有關記載又係點呢?梁武帝同達摩會面論議最早紀錄,就係响唐代《菩提達摩南宗定是非論》當中。內文就咁記載:「梁朝婆羅門僧字菩提達摩,是南天竺國國王第三子,少小出家,智慧甚深,於諸三昧,獲如來禪。遂乘斯法,遠涉波潮,至于梁武帝。武帝問法師曰:『朕造孝、度人、造像、寫經,有何功德不?』達摩答:『無功德。』武帝凡情不了達摩所言,遂被遣出。」呢段文字可以睇到梁武帝似乎覺得自己做咗好多嘢應有功德,但達摩一句「無功德」令佢好唔滿意,响話不投機下趕走咗佢。後嚟呢次會面後世人就加咗唔少對白,好似有埋達摩解釋點解梁武帝「無功德」,而且愈後出現嘅典籍就愈多對話內容。
原圖:《達摩》劇照