上次講過東晉法顯大師係中土往天竺取西經嘅第一人，亦提過下魏晉至隋唐時期佛教响中土大盛。而响隋唐時期，中國係成個亞洲地區嘅文化經濟中心，周邊啲小國都响中國學習，包括以前日本就有官員同僧侶到中土學習，其中一位就係玄昉。
每當提起日本僧侶到中國學習，可能史友們會先諗起空海大師，不過玄昉呢位僧人响日本宗教界名氣一啲都唔比空海低。玄昉係大和人，奈良時代僧人，俗姓阿刀氏。隨龍門寺義淵出家學唯識，响公元716年奉敕入唐，從智周學法相宗義，後嚟佢就响中國居留咗成二十年。响公元734年佢就返咗日本，攜回經疏五千幾卷，後以興福寺為佢嘅弘法中心。佢之後任僧正，雖然佢受到皇室殊遇，但後嚟因藤原廣嗣之亂被流放至筑紫觀世音寺，直至在此地圓寂。
至於玄昉其中一個最特別嘅經歷，就係獲唐玄宗賜位三品。响佢居住中國期間，唐玄宗聞其才學，於是賜位三品，贈紫袈裟獲，認真巴閉。
原圖嚟自網絡