嘩嘩嘩,真係估唔到大東山上嘅百年古蹟真係有機會重喚生機喇!事關中大建築學院宣佈,今年將會獲得約1,250萬元,進行為期三年嘅「重塑爛頭營:透過參與行動共創建築復修及自然保育」保育管理協議項目,喺呢段期間就會對大東山爛頭營進行歷史建築修復以及推動爛頭營嘅長遠保育與關懷,百年古蹟真係有機會得到活化喇!
提到今次計劃當中嘅重點「大東山爛頭營」,可能史友們都諗唔明點解呢座曾經嘅古村落會座落喺香港海拔最高嘅地方。其實爛頭營始建於1920年,當時西方傳教士嚟到香港以及其他地區傳教,但就因為難以適應酷熱夏季以及熱帶疾病,於是就選擇喺呢個高地建立傳教營地,專門畀西方傳教士用作避暑、傳教以及療養。就係咁樣令到大東山爛頭營成為華南及東南亞現存唯一具有此規模嘅石屋建築群。
爛頭營並冇電力以及自來水供應,一直都係靠居民保養石屋、自行開闢兼打理通往爛頭營嘅幾條山徑。所以,今次呢個消息一傳出,都真係對保育呢座百年古蹟起到重要嘅作用。
原圖嚟自網絡