之前阿史介紹咗唐玄宗賜紫袈裟俾日本僧侶玄昉嘅時候，就提及過遣唐使，今次阿史就想講下遣隋使。
簡單而言，遣隋使同遣唐使就係日本派往中國嘅使節團。遣隋使就係隋代時期使節團，遣唐使就係唐代時期使節團。據資料顯示，响日本推古天皇時期，就曾經至少五次派遣隋使到中土。有趣嘅係，根據歷史文獻記載，遣隋使除咗官員，仲有僧人同學生，目的係去中國求佛法同學習中原文化。
之不過，响史籍嘅記載中，就顯示出隋代皇帝對佢哋印象麻麻，《隋書‧東夷傳俀國傳》就載有隋文帝問遣隋使嘅對話：「開皇二十年，倭王姓阿每，字多利思北孤，號阿輩雞彌，遣使詣闕。上令所司訪其風俗。使者言倭王以天為兄，以日為弟，天未明時出聽政，跏趺坐，日出便停理務，雲委我弟。高祖曰：『此太無義理。』於是訓令改之。」至於隋煬帝時就更誇張，話說日本使者俾隋煬帝嘅國書就話「日出處天子至書日沒處天子無恙」，日本人稱佢哋天皇為「日出處天子」，稱隋煬帝為「日沒處天子」。隋煬帝睇完國書好唔高興，話呢啲「蠻夷書信」以後唔駛再俾佢睇。
原圖嚟自網絡