「誅九族」呢種殘酷嘅刑罰相信史友們都必定聽過，但喺歷史上「誅九族」並唔係極限，因為真實發生過嘅歷史事實就係有「誅十族」。咁到底邊位歷史人物犯咗事，會令到「誅十族」呢種刑罰出現呢？阿史今次就同大家講一講啦！
慘遭「誅十族」嘅呢位人物，正正就係明朝文學大家方孝孺。明明只係一位文人，又點解會遭遇到呢種殘酷刑罰呢？方孝孺本身就係明朝嘅文學家，而喺建文帝朱允炆即位後，就對佢委以重任，甚至大小事都會聽從佢嘅意見。之不過，喺燕王朱棣發動靖難之變後，建文帝朱允炆行蹤成謎。本來前朝嘅臣子朱棣都冇打算留，但謀士姚廣孝就特別提到「方孝孺不可殺」，所以朱棣都嘗試提出禮遇。
但係，方孝孺自己就唔想委曲求全，所以喺朱棣要求佢起草即位詔書之時，方孝孺用盡方法拒絕，到最後仲寫上「燕賊篡位」四字後罷筆。眼見呢個情況，朱棣揚言要誅佢九族，但當時方孝孺就回應「滅我十族又如何？」就係因為呢句說話，方孝孺朋友、門生就被列為第十族，足足800幾人慘遭牽連，行刑時間長達7日。連方孝孺自己都被處以凌遲，死得相當慘烈！
原圖嚟自網絡