上次介紹隋文帝出兵高句麗個陣，用咗張當年大台套《大運河》嘅劇照，而有史友留咗個言阿史覺得幾有趣，就係當年套《大運河》因選角問題，因而被誤導楊堅同李淵同輩，楊勇楊廣同李世民同輩。因為楊堅飾演楊堅嘅鮑方同演李淵嘅劉兆銘睇落似同輩，演楊廣嘅吳啟華同演李世民嘅劉青雲睇落又似年紀差唔多。
當然！响歷史上佢哋關係自然唔係咁樣。楊堅其實係李淵嘅七姨丈，李淵媽媽元貞皇后獨孤氏，係西魏北周時期重要將領、八柱國之一獨孤信個第四女，而獨孤信第七女獨孤伽羅就係楊堅個太太，而楊堅年紀就大過李淵廿幾年。至於隋煬帝楊廣，佢其實只係細李淵三歲左右，所以楊廣同李淵其實先係同輩。至於李世民，佢年紀就細楊廣成三十年，所以楊廣其實係李世民嘅長輩。
不過，大台拍劇選角，拍得好睇就得啦！邊理得咁多。
原圖嚟自網絡