上次介紹咗湖南省洞庭湖出現神秘遺跡，今次阿史就想介紹下呢個中國最大嘅淡水湖泊，不過只係曾經係最大。
洞庭湖曾經中國第一大淡水湖，昔日號稱「八百里洞庭」，係長江中游嘅過水湖，長江經松滋、太平、藕池三口分流入洞庭湖，响汛期為長江分流儲水，令湖區周邊有良好水資源以及帶嚟肥沃土地。不過咁，依家洞庭湖就遠比以前細，面積比鄱陽湖仲要細，令洞庭湖由中國第一大湖降至第二大湖。
咁點解洞庭湖面積會細咗呢？其中一個原因就係泥沙淤積，令洞庭湖變得淺水。另一方面，當地居民圍湖造田亦令原為湖泊嘅地方變成農地，導致湖面積大減。據統計，洞庭湖依家以每年約50平方公里速度縮細，昔日文人所記載嘅「洞庭秋月」、「遠浦歸帆」、「平沙落雁」等美景都好可能之後會消失。
原圖嚟自網絡