繼續同史友們介紹我國新奇嘅考古發現，講到收埋私房錢，相信唔少結咗婚嘅史友都好有經驗。之不過，如果要收埋成窖私房錢，大家又做唔做到呢？
近日喺江蘇鹽城建湖縣就有一個窖藏遺存被發現，喺最初村民就只係無意中搵到幾個古錢幣，於是就推斷地底可能會有好多珍貴物品。喺當地部門封鎖並展開發掘之後，成個窖藏就開始清晰，整個窖藏坑口呈方形，長1.63米，寬1.58米，深0.5米，面積並唔算好大。之不過，就係喺一個咁細嘅地方，考古團隊就搵到約1.5噸、由古代草繩串聯並且分層平鋪嘅成貫銅錢。
呢啲銅錢表面銘文清晰，唔單止有宋朝太平元寶以及大觀通寶，仲有唐代時期開元通寶，時間跨度非常大。考古團隊就推斷收藏者並唔係普通人，並且仲係專門為保存錢財而開挖地下場所，相信鄰近區域仲會有更加值錢嘅金屬物品、瓷器等等，真係令人期待有更多發現！
原圖嚟自網路