1936年12月12日,中國發生一場震驚中外嘅事件,就係「西安事變」。就係因為呢次事件令中國國民黨同中國共產黨實現第二次國共合作,共同抗日。相信史友們都知西安事變發生後張學良同中國共產黨領導層商議聯合抗日事宜,但原來中國共產黨本身並唔知道西安事變會發生。
其實早响1936年10月到12月,張學良已數次面見同寫信俾蔣介石,反對繼續「進剿」紅軍,但就遭到蔣介石拒絕,兩人更因此多次發生爭辯。到咗12月4日,蔣介石抵達西安,仲迫令東北軍主帥張學良同西北軍主帥楊虎城其軍隊全部開赴陝北前線,否則就將東北軍、第十七路軍調離陝甘,由中央軍接替軍事行動。之後幾日張學良同楊虎城雖然係咁勸蔣介石應以國家民族大義為重,容納抗日主張,但就遭到蔣介石斥責。張學良、楊虎城決心採取「兵諫」呢種非常手段,軟禁蔣介石逼佢支持抗日。
實際上,中國共產黨事先並唔知道西安事變會發生。而响事變發生當天,張學良就化名李毅發電報俾毛澤東、周恩來等人,請教佢哋「高見」。電報中就寫咗:「吾等為中華民族及抗日前途計,不顧一切……迫其釋放愛國分子,改組聯合政府。兄等有何高見,速告,並望紅軍全部速集於環縣一帶,以便共同行動,以防胡敵北進。」中共中央收到電報後緊急磋商,決定應張學良邀請,周恩來、博古、葉劍英等人親赴西安協助解決呢場內戰危機。响12月17日至23日,周恩來同張學良、楊虎城經過多次談判,成功迫使蔣介石作出了「停止剿共,聯紅抗日」承諾。
原圖嚟自網絡