每當提起南京大屠殺呢段悲痛歷史,可能唔少人都會覺得日本方面多年嚟都唔肯承認甚至否認日軍所犯下嘅戰爭罪行,甚至製造大量偽證否認呢段歷史。不過,有一位日本學者,多年嚟為求還原呢段歷史真相而作出努力,佢就係笠原十九司。
笠原十九司生於1944年,係日本都留文科大學名譽教授。响日本歷史學界佢南京大屠殺史嘅研究專家。佢從八十年代開始收集日本國內否定派有關否認侵華戰爭同南京大屠殺歷史嘅書籍,專門研究呢啲資料係點樣有問題以及當中真偽以及矛盾,而就南京大屠殺史佢已經有十幾本個人專著。
至於笠原點解會研究南京大屠殺歷史呢?緣於佢大學老師家永三郎一宗「教科書訴訟案」。當年家永三郎所編寫嘅高中教科書《新日本史》中提及南京大屠殺,但日本文部省响審定時就要求家永三郎修改同刪除書中關於南京大屠殺嘅內容。家永三郎拒絕妥協,仲狀告日本政府。為咗支持恩師,笠原十九司就親自到南京實地調查,並且出庭作証,最終幫助家永三郎取得部分勝訴。
而响佢多年嚟研究生涯,經常受到右翼分子滋擾甚至恐嚇,而佢本人就抱持住一個信念,就係「不能讓謊言到處傳播」。佢响一個訪問中講過,一個國家如果對公眾隱瞞事實真相,就會走上錯誤嘅道路,呢個就係日本戰前嘅教訓。
原圖嚟自網絡