尋日就同史友們介紹完漢武帝劉徹係史上最鍾意打仗嘅皇帝，之不過佢除咗以「好戰」聞名之外，其實仲有一件事都算得上係史無前例，就係後宮佳麗嘅數目喇！
先喺人數方面講，漢武帝劉徹喺各宮當中供養嘅美女據統計就超過一萬八千人，普遍嚟講都係15歲至18歲之間嘅少女，而大過30歲嘅女人都係需要遣出後宮而另嫁，要求真係相當嚴格。由於後宮人口數量龐大，令到原本嘅後宮都根本唔夠位住，所以喺太初元年就特別興建咗宮長三十里、千門萬戶嘅建章宮，真係相當誇張！
講完數量之後，就要具體講講後宮到底有咩人喇！當時漢武帝劉徹喺建成「建章宮」後，就特意喺燕、趙兩地搵嚟二千幾名美女入宮，而佢一生亦都有陳阿嬌、衛子夫、李夫人、趙鉤弋等史上著名美人，即使已經進入古稀之年，劉徹仍然係沉迷女色，真係「前無古人，後無來者」啊！
原圖嚟自網絡