唔知史友們有無留意，响前幾日出現咗「木星合月」嘅天文現象，即係木星同月亮運行响同一經度上，兩者距離好近，用肉眼就可以好輕鬆睇到呢個天文現象。今時今日科學發達，對天文現象都有科學嘅解釋，不過响中國古代，對於天文現象都會視為異象，可能係吉兆，亦可能係凶兆。
有關古代對天文異象嘅記載，都有好多特別講法同詞彙，好似天狗食日、熒惑守心、五星連珠等。而呢啲天文異象往往會被視為一啲與政治相關嘅預兆。好似天狗食日，即日食，會被視為大大嘅不祥之兆。而熒惑守心，即火星响心宿轉向，就代表皇帝會駕崩。至於五星連珠，即金、木、水、火、土星响同一經度直線排列，就係大吉之兆。
至於點解古人會將天文異象同吉凶扯上關係呢？其中一個講法就係有啲有心人利用呢啲天文學去講成災異論，從而抑制皇權。好似《左傳》中記載了一段晉平公同士文伯關於日食預兆嘅對話，士文伯就話「國無政，不用善」。咁似乎古代應該係有啲人刻意將天文異象政治化。當然！亦有學者認為將兩者講埋一齊係一種神秘主義嘅表現，亦係佢哋用當時價值觀去解釋天文異象。
原圖嚟自網絡