上次介紹過二十世紀初果陣,港島半山有座豪華大酒店,酒店擁有者就係庇理羅士家族。講到庇理羅士呢個名,相信史友們都第一時間諗起港島一間名女校,而呢間學校同庇理羅士,原來又有一段故。
庇理羅士係生於印度加爾各答嘅猶太商人,1862年到咗香港經營鴉片貿易生意,後嚟更擔任香港上海匯豐銀行董事,兩度出任立法局議員。而佢响香港生意都做到好大,擁有多項物業,包括香港島中環炮台里莊士敦樓,中環柏拱行等。而响1890年,當時港英政府設立中央女子書院,等當時嘅女性平等接受教育嘅機會。而响1893年,庇理羅士就捐出25,000港元俾中央女子書院,令學校能响中環荷里活道中央書院原址興建一幢三層高嘅新校舍。而為咗感謝庇理羅士嘅捐獻,學校改以佢個名字嚟命名,就改名為庇理羅士女子中學。到咗1965年,庇理羅士女子中學從中環校舍搬遷到今日位於銅鑼灣天后廟道嘅校舍。
原圖嚟自網絡