相信睇過電影《逃學威龍》嘅史友，都應該記得中史老師講過「明代最講刑法，一律要嚴刑對待」，其中潛偽竊私更加要行宮刑。電影情節就咁交代，咁歷史上明代刑法又係咪真係咁重呢？
明代嘅律例主要係以朱元璋建國初期親自制定嘅刑法《大明律》為基礎，雖然後嚟佢後嚟陸續頒佈《御製大誥》、《御製大誥續編》、《御製大誥三編》、《御製大誥武臣》，不過《大明律》仍然係整個明代法制嘅基礎。而响明代，謀反同謀叛係極重罪行。根據《明大律》，謀反大逆、謀叛均列為「十惡」大罪，亦寫明謀叛失敗會有乜嘢下場。根據律列，「凡謀反，謂謀危社稷及大逆，謂謀毀宗廟，山陵，及宮闕但共謀者，不分首從，皆凌遲處死。」即係話謀反者唔理係主謀定同謀，一律要被凌遲處死。除咗主犯要受酷刑外，佢哋家人下場都會相當淒慘：「祖父、父、子、孫，兄弟，及同居之人，不分異姓，及伯叔父兄弟之子，不限籍之同異，年十六以上，不論篤疾廢疾，皆斬，其十五以下，及母女妻妾姊妹，若子之妻妾，給付功臣之家為奴。」即係要為奴為婢。
至於謀叛，定義就係「謂謀背本國，潛從他國」，以今日嘅觀念就係叛國，刑罰係「共謀者，不分首從皆斬」。至於佢哋家人會點呢？律例就規定「妻妾子女，給付功臣之家為奴。」都係要為奴為婢。
講到明代嘅重刑都真係仲有好多嘢可以講，留返下回分解。
原圖：電影《逃學威龍》