與二戰納粹德國相關嘅寶藏傳說向來都係唔少考古迷嘅熱話，而近日荷蘭國家檔案館就公布咗一批文件，其中就真係有一樣藏寶圖曝光，可能涉及1.4億嘅珠寶，阿史今次就同大家講一講啦！
據英國《衛報》報導，二戰末期，德軍由於連連戰敗令到唔少喺他國嘅納粹德國需要逃離歐洲占領地。喺呢個過程中，由於佢哋唔能夠帶走大量珠寶，於是就有4個德國士兵合力將4箱裝滿硬幣、手錶、珠寶、鑽石以及各種寶石嘅彈藥箱埋藏喺荷蘭鄉間嘅一個地方。喺當年嚟講，呢幾箱珠寶就被估計價值300萬荷蘭盾，時至今日甚至仲等同1585萬英鎊（折合約1.4億港元）。
講就講到好似真咁，但到底呢啲珠寶係咪存在呢？荷蘭國家檔案館其實早喺戰後幾年都好努力嘗試去搵返呢啲被納粹掠奪嘅寶藏，但最後都係得個「吉」。今次公布嘅1300幾份歷史文件連同納粹藏寶圖，正正就係當時努力嘅成果。呢份納粹藏寶圖正正就係喺戰後由一個德國士兵赫姆特（Helmut S）手中取得，仍聲稱珠寶係嚟自一場銀行爆炸縱火案，但經過75年嚟都藏寶圖仍然未能破解。
雖然唔少歷史學家都質疑到底珠寶係咪存在，但荷蘭國家檔案館今次將藏寶圖公布網路，可能都係希望由民眾親自解開答案！
原圖蹳自網絡