梵高（Vincent van Gogh）著名畫作《向日葵》相信唔少史友都可能親眼見過，而呢幅作為東京SOMPO美術館鎮館之寶，係喺1987年由安田火災保險（東京SOMPO集團前身）以4000萬美金購入，至今已經持有畫作接近35年。畫作嘅擁有權睇落好似冇乜爭議，但近日就有猶太銀行家後代要求日本歸還梵高《向日葵》，阿史今次就同大家講一講啦！
梵高《向日葵》繪於1888年，可以話係梵高最有名嘅畫作之一。而安田火災保險當年成功購入呢幅作品，亦都真係轟動咗當時嘅美術界。近日東京SOMPO就遭到一位德國猶太裔銀行家Paul von Mendelssohn-Bartholdy後代提告，當中就指出呢幅《向日葵》之所以喺當年會被賣出，全因為佢嘅祖先喺納粹政策下被迫拋售，所以東京SOMPO係屬於非法持有，所以就要求佢哋交還返畫作畀佢。
Paul von Mendelssohn-Bartholdy嘅繼承人亦都指出，雖然東京SOMPO集團唔係直接促成逼害嘅一方，但呢種方為就等同忽略畫作痛苦過去，完全唔理畫作為「納粹政策下受損物件」毅然進行收購，係唔合理亦都唔道德，唔知史友們又點睇呢？
原圖嚟自網絡