喺唔少喜劇類嘅影視作品當中,都不時有啲場景係描述古代嘅帝皇喺青樓偶遇大臣嘅場景,咁到底擁有三千後宮佳麗嘅皇帝,又係咪真係會去青樓尋歡呢?阿史今次就同大家講一講啦!
首先,古代對「青樓」嘅定義同現代比就已經有啲唔同。最初關於「青樓」嘅定義並唔係指風月場所,而係「帝王宮殿」或者「門閥豪貴樓閣」,簡單嚟講就係豪門高戶。而去到唐宋年間,呢個詞先至成為「妓院」嘅代稱,所以喺唐宋年間以前嘅帝王如果有去「青樓」,都唔一定代表佢哋係去「妓院」。
至於喺唐朝嚟講,「青樓」又被稱為教坊,高級嘅教坊就會有藝術排演以及宮廷俗樂表演,技藝出眾嘅女子係真係可以喺皇帝面前表演。喺呢個時期,帝皇係會專門將教坊嘅優秀女子招入宮中,而淨低技藝較差嘅女子就連同周邊嘅妓院合流,去到明朝就真正出現咗「青樓妓院」。
除咗將「青樓」女子招入宮中,古代帝皇其實仲會出盡奇招涉足「青樓」,就好似唐玄宗為自己開創咗名為「梨園」嘅樂舞機構,定期喺青樓挑選美女;宋徽宗為咗同青樓名妓李師師相會,就不惜喺宮中挖地道直通達鎮安坊,真係相當誇張!
原圖嚟自網絡