無論係喺古今中外，採花賊呢種毀女性清白犯罪行為都真係人人得而誅之。喺明朝歷史上，就曾經有一位採花賊10年侵犯180多名女性，最終就驚動埋皇上，被判凌遲處死。阿史今次就同大家介紹一下呢位明朝嘅採花賊桑沖。
喺明朝年間，山西太原就有一位名為桑沖嘅男子，佢自小就遊手好閒、不務正業，喺聽聞過江湖上一位採花賊嘅事蹟後，就親自搵到對方拜師學藝。據《明憲宗實錄卷一百七十二》記載，桑沖就會「為婦人裝，以誘淫良家女婦，有不從者，用魘魅淫之。沖盡得其術。」原來呢位採花賊最大嘅絕技就係男扮女裝，通過假扮女性去誘騙良家婦女。
為咗令到自己扮得最似，桑沖就不惜去學習女性嘅行為以及言談，甚至仲用藥去除自己身上嘅體毛，令到自己外貌睇落真係似一個女性。下咗咁多「苦工」之下，就會編造自己遇人不淑嘅故事，騙取女性信任後就會半夜侵犯女子，十年嚟侵犯180多名女性，被侵犯嘅女性大多數事後都唔敢出聲，所以佢先可以生存咁耐。
結果有一次，扮女人扮得太過神似嘅桑沖喺想侵犯他人之前，就被該戶人家嘅男子睇中，仲好快畀人發現佢係男性。結果桑沖所犯嘅事就咁東窗事發，最終驚動埋明憲宗，下旨「上以其情犯醜惡，有傷風化，命凌遲於市」，桑沖就被凌遲處死。
原圖嚟自網絡