又繼續同史友們睇一睇環球嘅考古消息,埃及政府宣佈,考古學家喺南部城市樂蜀成功挖掘出一座估計有三千五百年歷史嘅古埃及第十八王朝古墓,古墓嘅歷史甚至仲可以追溯到公元前1550年,阿史今次就帶大家睇一睇啦!
呢次嘅考古發掘係由埃及與英國聯合考古團隊展開,而呢座王朝陵墓嘅位置正正就係鄰近埋葬好多法老與古埃及貴族嘅「帝王谷」一帶。據考古學家判斷,呢座陵墓屬於古埃及新王國時期嘅第十八王朝,可能係第十八王朝法老圖特摩斯一世家族嘅女性成員。
第十八王朝又係古埃及「新王國時期」的第一個王朝,被認為係古埃及最繁榮時期之一,所以對於陵墓內部狀況考古學家本身係相當有期待。之不過隨住考古工作進行,考古團隊就發現陵墓內部狀況欠佳,受到古代發生洪水影響,墓室內部有大量沉積物,包括墓室銘文在內都受影響。
原圖嚟自網絡