嘩嘩嘩，真係估唔到遠在天邊，近在眼前，喺廣州南沙竟然成功出土到一個先秦時期嘅遺址，到底當中有咩睇？阿史今次就同大家講一講啦！
早前為咗配合舊村更新建造工程，廣州市文物考古研究院對合成村進行考古勘探，結果過程中就搵到一個先秦時期嘅文化遺存。經過考古發掘之後，考古團隊就成功發掘出一個面積達到 2000平方米嘅遺址，當中就清理出遺跡408處、柱洞300個、墓葬3座以及重要文物標本172件，當中仲包含商時期、西周時期、唐宋、明清四個階段文化堆積，真係相當豐富。
考古團隊根據出土遺物特徵及堆積狀態判斷，呢個遺址喺商時期極有可能係聚落嘅生產生活場所，而呢次發現唔單止豐富珠江口西岸嘅先秦考古材料，而且仲為研究環珠江口地區夏商時期考古學文化嘅年代序列，先民生產、生活基本面貌提供重要考古實物資料！
原圖嚟自網絡