明朝開國皇帝朱元璋嘅一生相當傳奇，由一個路邊乞丐參加到義軍南征北戰，最終消滅勁敵陳友諒創建明朝。正因為佢經歷過咁多，所以為咗確保佢朱家江山長久，喺治國過程中亦都殺害咗唔少開國功臣。之不過，一位咁心狠手辣嘅人物，喺臨終之時到底點解口中不停提住四個字？阿史今次就同大家講一講啦！
要知道朱元璋除去自己手下一批開國功臣以及武將其中一大原因，係為咗可以令到自己嘅皇孫登上帝皇。同其他朝代、其他帝皇唔同，朱元璋並冇傳位畀自己嘅兒子，反而係向皇孫傳位，呢個舉動亦都令到唔少身為藩王嘅兒子不滿。雖然朱元璋生性兇殘，但佢自己亦都預料到呢一點，特別係預計到自己嘅四子朱棣好大機會會造反。有咗呢份擔憂，為咗可以令到皇孫順利繼位，朱元璋甚至仲下咗一道旨，就係唔準任何藩王喺佢死後回京弔唁。換言之，任何皇子都冇辦法冇藉口返到京城。
咁呢一點又同朱元璋臨終口中嘅四個字有咩關係呢？原來喺朱元璋臨終時，佢曾經一改主意，想召朱棣回京並且動之以情，等佢可以好好輔助朱允炆。但唔知道內情嘅朱允炆就以為朱元璋打算另立新帝，極力阻止燕王朱棣回京，就連朱元璋臨終前不停講到嘅「燕王來否」都冇人理會。就係咁樣，「靖難之役」嘅禍根就此埋下。
原圖嚟自網絡