今年過咗年初五之後,好多公司陸陸續續都啟市,最近就有一條網上影片,拍低有商店啟市當日請咗舞獅採青,但採青疑似失敗,真慘情也!
相信史友們都見過過年開市時會有舞獅作採青,咁點解要咁做呢?採青其實係南派醒獅一個獨有傳統,「青」分為「菜青」及「旗青」,「菜青」就係綁上生菜,寓意「生財」;「旗青」就係寫啲吉利語句,通常係好長好高嘅對聯。而舞獅過程中,師傅一定要完成「見青」、「驚青」、「採青」、「碎青」、「吐青」同「醉青」呢啲步驟先算係完成舞獅。所以,農曆新年開市時,商戶通常會請醒獅隊嚟舞獅,加埋採「菜青」,寓意嚟緊一年生財。
有趣嘅係,俗語「擒青」就係由舞獅而來。因為舞獅師傅要完成晒所有步驟先可以攞封大利是走,如果未完成就心急拎利是,就會俾人話「擒青」。
原圖嚟自網絡