記得睇大台套《封神榜》,姜子牙騎住隻「四不像」,估唔到最近有人响網上分享,話見到「六不像」。
話說陝西一名男子响山區見到隻受傷嘅黃色怪牛,於是就俾咗啲蔬果佢食,最神奇係嗰位男子問隻牛食唔食嘢時,隻牛竟然好似識聽人話咁俾反應。佢及後通報俾相關單位工作人員知,原來呢隻受傷怪牛係屬於國家一級保育動物,名為羚牛,同國寶大熊貓地位相同,因此又被稱為「國寶牛」。據了解,羚牛主要分布喜馬拉雅山東麓密林地區,甘肅省、陝西省、青海省、四川省、雲南省及西藏自治區都有機會見到佢身影。不過,佢哋依家响全球得返幾千隻。
由於羚牛外表似牛似羊又似馬,因而俗稱「六不像」。亦有人話呢種動物同《山海經》中嘅「羬羊」相似,又有人話佢似「土螻」。無辦法啦!因為羚牛呢隻「六不像」,同《山海經》所載嘅怪獸又真係有啲似。
原圖嚟自網絡