如果史友們近排有喺觀塘海濱行開，可能都會發現呢個地方嘅橋墩有唔少重大嘅變化出現，就係現場有多達三十組唔同主題嘅巨型壁畫。呢啲壁畫睇落當然好靚，但喺靚嘅背後原來仲係講述緊九龍東一系列嘅歷史以及各個行業，阿史今次就同大家講一講啦！
呢批巨型壁畫就係由「城市藝裳設計比賽-飛躍天橋底2.0」勝出團隊建築師梁安裕以及設計師龍曉琳所設計，由起動九龍東辦事處開始，沿住「發現號」各個場地及海濱道公園，大家就可以通過30組唔同嘅畫作了解九龍東唔同時期、唔同行業人物嘅工作同生活。
為咗繪制呢批畫作，呢個團隊就用咗大量時間了解歷史，例如「觀塘」本名為「官塘」，源於南宋時期呢度係得到朝政府允許設立嘅官方鹽塘，喺呢個切入點之下，設計團隊就希望可以創作更多見證觀塘歷史嘅作品，就好似以九龍麪粉廠為創作藍本嘅畫作、五六十年代造船業、輕工業時期塑膠花製作業，到現時金融業、設計業都一應俱全。史友們如果有興趣，真係不妨去打個卡、集個郵了解下歷史！
原圖嚟自網絡