上次阿史介紹咗西貢鹽田梓村係香港其中一條新界原居民村落，而响新界原居民村落裡面，都會有祠堂，作為村中族人拜祭以至處理宗族事務嘅地方。不過响鹽田梓村，就只有教堂無祠堂，點解會咁呢？
阿史早排參加當地生態遊個陣，就曾經聽帶隊導遊介紹，話鹽田梓村原為深圳鹽田村陳氏家族成員，後嚟南遷定居島上落地生根。到咗十九世紀，部分傳教士响鹽田仔傳教，當中島上幾名聲望高嘅陳氏村民受洗，基於佢哋嘅影響力，漸漸其他村民都領受聖洗加入天主教。到咗1875年，鹽田梓全島居民全部領受聖洗，鹽田梓村成為天主教在香港主要發源地之一。亦由於宗教關係，因此島上島上就只有天主教教堂，而無設祠堂、廟宇同土地公。當然，導遊講完阿史即刻翻查返資料，又真係堅料嚟！