繼續同史友們介紹本地最新嘅一啲重點展覽，由今日起香港故宮文化博物館就會舉辦首個以自身館藏為主題嘅特展，名為「金彰華彩──香港故宮文化博物館與夢蝶軒藏古代金器」。
呢次展覽就會展出超過200件精美嘅古代中國金器，年代跨度足足有三千幾年歷史，足以展示出三千幾年嚟古代中國喺黃金製品上嘅藝術以及技術成就，而呢啲館藏大部分都係由收藏家盧茵茵、朱偉基捐贈。
咁喺200幾件花多眼亂嘅藏品當中，到底又會有咩重點展品呢？喺展覽嘅第一部分，就有匈奴貴族所使用嘅金冠，呢個動物紋冠正係呈現出虎鹿搏鬥嘅場景，有助大家了解到公元前18世紀至漢代北方草原與中原地區嘅早期金器。除此之外，其實古代唔少金器都係有融入到其他寶石，就好似龍紋腰帶鉤、「榮耀之臉」肩飾等等，都係用咗極為複雜嘅功藝先以金線勾勒輪廓繼而嵌入寶石，淨係睇呢啲工藝就已經相當值得，有興趣嘅史友不妨去睇一睇啦！
原圖嚟自網絡