同「九子奪嫡」相關嘅影視作品相信史友們都睇過唔少，呢場最初涉及九位皇子五個黨派嘅爭奪皇位之戰，最終就喺四爺黨、八爺黨兩個黨派鬥爭之下，以四爺黨皇四子雍親王胤禛取勝告終。之不過，到底當中嘅內幕又係點樣呢？溥儀、溥傑兒時就曾經有過一啲驚人發現，阿史今次就同大家講一講啦！
作為晚清最後一位皇帝，溥儀雖然喺6歲之時就被迫退位，但退位之後佢仍然可以同弟弟溥傑留喺宮中生活。喺佢哋一次遊玩當中，就喺養心殿偏殿嘅一個暗櫃當中無意搵到一個佛龕，當佢哋打開佛龕就發現入面嘅一張黃色紙。喺好奇心驅使之下，佢哋打開紙張一睇，竟然發現當中係寫有雍正命人毒殺自己八弟允禩、九弟允禟嘅密詔。而巧合地，八弟允禩、九弟允禟都係喺雍正四年先後因「腹疾」去世。
之不過，喺得知咁重大嘅消息後，呢兩兄弟並冇張揚出去，反而係默默地將紙張放返原位，直到溥儀去世後，溥傑先至將呢件事喺《末代皇弟溥傑傳》一書中寫出嚟，但當時嘅佛龕就已經搵唔返喇！
原圖嚟自網絡