嘩嘩嘩，真係完全冇諗過有生之年可以見到有一部港產片喺咁短時間內破億票！由黃子華、謝君豪、何啟華、楊偲泳等演員主演嘅的賀歲電影《毒舌大狀》早喺年三十上映之時就已經大收旺場，但勢估唔到喺上映嘅32日之後，呢部電影竟然成為總票房突破1億港元嘅電影，《毒舌大狀》繼續打破港產片紀錄，穩坐香港影史港產片No.1！呢部劇情夾雜幽默、憤慨、感動嘅電影就有唔少網民暗指係影射1999年彭楚盈白骨奇案，當時呢宗案件都真係轟動一時。
打破香港影史票房紀錄就當然犀利，但如果要計埋香港史上最高嘅十大票房，《毒舌大狀》目前就係同排第十嘅《鐵甲奇俠3》（Iron Man 3）相差600幾萬，同第九名嘅《壯志凌雲：獨行俠》（Top Gun: Maverick）差700幾萬，要超越都唔係冇可能！
提起呢個壯舉，台前幕後都表示自己冇諗過，而導演就直言希望快啲有下一部港產片打破紀錄。電影確實係一個「夢工場」，可能就如同謝君豪所講「電影要入戲院睇，即係等於舞台劇要入劇院睇一樣。」
原圖嚟自網絡