繼續同史友們介紹我國最新嘅考古發現，秦始皇兵馬俑嘅考古工作早喺1974年展開，而大家目前見到嘅兵馬俑大多數都係喺1976年－1978年出土。雖然以往嘅兵馬俑已經係相當犀利嘅考古發現，但關於兵馬俑嘅考古研究其實從來都冇中止過！
近日陝西省文物局就發佈秦始皇帝陵兵馬俑一號坑、清平堡遺址嘅多項重要考古成果。喺2009年至2022年間，考古團隊就對一號坑進行過第三次嘅發掘工作，結果就喺第三次發掘呢個大型陪葬坑過程當中，就清理出200幾件陶俑、陶馬16匹；戰車4乘、鼓2處、鼓槌1處等等。憑出土陶俑嘅位置，考古團隊就基本上搞清楚軍陣排列規律。
同時憑住破碎嘅陶俑，考古團隊亦都研究出陶俑製作程序，例如俑嘅雙臂係單獨製作，喺陶俑軀幹完全製作之後先至二次覆細泥，喺經過細部雕飾再黏接雙臂，呢啲研究聽落就好似好簡單，但實際就困擾咗考古學界多年。
隨住更多嘅兵馬俑文物出土，考古團隊對彩繪保護與文物修復都取得唔少突破，期待佢哋有朝一日可以解開更多兵馬俑之謎！
原圖嚟自網絡