最近介紹咗唔少改革開放初期响廣東出現嘅「新事物」,今次就想講講高爾夫。不過有趣嘅係,高爾夫球場响中國出現並唔係改革開放初期嘅事,而係一百年前。
高爾夫運動第一次响中國出現係响民國初期,响1917年上海虹橋高爾夫總會開始投入運營,呢項歐洲人嘅運動玩意就响中國出現。不過資料顯示,雖然當時有高爾夫球場,但規模同場地質素就無得同今日嘅高爾夫球場相比。而後嚟因為戰亂,高爾夫球响中國就無進一步發展。
而符合現代化規模嘅高爾夫球場响內地出現,就係响改革開放初期嘅事。响1984年,由港商霍英東、鄭裕彤等人出資創建中山溫泉高爾夫鄉村俱樂部,成為新中國成立後內地第一座現代化高爾夫球場。但其實早响呢個高爾夫場成立之前,當時全國人大常委會副委員長廖承志就已經有意推動高爾夫球場建設,目的係為响內地投資嘅境外商人提供休閑度假場所,而深圳市亦响八十年代開始規劃興建高爾夫球場。
原圖嚟自網絡