記得細個個陣，阿史基本上分唔到燒鴨同燒鵝，大個咗之後就梗係知道兩者分別好大。講到食鵝，史友們應該都成日食燒鵝或者潮式鹵水鵝，咁大家又有無聽過碌鵝呢？
碌鵝係東莞一道名菜，最出名就係當地嘅塘廈碌鵝。唔知史友們會唔會覺得好奇怪？呢道美食點樣將隻鴨拎嚟「碌」呢？唔通係拖地叉燒啲兄弟？其實呢個「碌」係當地方言，即「煮」咁解。碌鵝嘅製法就係响把鵝肉放入調制好的湯汁裡煮熟，而呢個「碌」嘅過程就包括咗蒸、炸、煮，隻鵝先會入味。
至於要做碌鵝，就唔係乜鵝都可以，據了解通常係用出世100日左右嘅客家土鵝，因而又名「百日鵝」。因為太細隻肉質容易縮水，經唔起「碌」嘅過程，隻鵝太老「碌」出嚟肉質會太老。
不過咁，除咗東莞外，廣東省內都有唔少地方話自己係「碌鵝」發源地，阿史見到其中一個資料，就話惠州潼湖碌鵝就有超過200年歷史。至於個「碌」字，佢哋就係指煮嘅過程隻鵝不斷翻轉嘅意思。
原圖嚟自網絡