【講開有段故】中國首次記錄柬埔寨係幾時?
近年柬埔寨成為唔少中國人去做生意同去旅遊嘅東南亞國家,因為柬埔寨呢個國家都有好多歷史文化古蹟,而且自古以來呢個地方就同中國有相當多嘅交流同接觸。咁自古以來又古到幾時呢?答案就係漢代。
古代中國嘅海上交通,最著名同最具規模就係海上絲綢之路。海上絲綢之路醞釀自先秦,成形於西漢,呢條航運交通其中一個途徑之地就係今日柬埔寨一帶。據《漢書·地理志·粵地章》所載:「自日南障塞徐聞合浦,船行可五月,有都元國;又船行可四月,有邑盧沒國;又船行可二十余日,有諶離國;步行可十餘日,有夫甘都盧國;船行可二月餘,有黃支國......自黃支船行可八月,到皮宗;船行可二月,到日南、像林界雲。黃支之南,有已程不國,漢之譯長自此還矣。」都元國、盧沒國、諶離國、夫甘都盧國,呢啲國家大概就係今日越南、柬埔寨、泰國、馬來西亞等地曾經出現過嘅國家,因此呢個亦可視作為對古時柬埔寨一帶嘅文字記錄。
而响三國時代,吳國嘅康泰响出使南方小國後將見聞寫咗本《吳時外國傳》,成為古代記錄南海一帶最早嘅地誌專書,當中都有提及東南亞各國狀況,包括咗依家嘅柬埔寨一帶。
原圖嚟自網絡