繼續同史友們介紹我國最新考古發現，近日喺新疆尼勒克吉仁台溝口遺址高台遺存就出土咗同木質車輛相關嘅40幾件組件，當中唔少仲係我國迄今為止年代最早、數量最多、保存最完整嘅木質車輪實物，阿史今次就同大家介紹下啦！
喺位於伊犁河谷嘅吉仁台溝口遺址，係由居址區以及高台遺存組成，地理位置上嚟講就係依山面水，而高台本身就係以120米見方石構建築組成。喺2019年至2022年間，考古團隊就通過清理、解剖高台遺存局部、發掘中心墓室等工冽，確定呢個正正就係目前新疆乃至歐亞草原發現青銅時代面積最大、規格最高、保存最完整嘅石構墓葬建築遺存，年代仲可以追溯到公元前15世紀。
唔單止咁，喺高台遺存嘅東北部，考古團隊仲成功發現到木質車輛構件40幾件，由實心嘅木車輪、車轅、車軸、車廂都有齊，甚至仲有全國首次發現由牛骨以及馬骨製成嘅骨製冰鞋。由各種遺物掩埋嘅分析推斷，距今超過3500年前嘅古人係有意識咁樣集體掩埋呢啲遺物。呢次咁重大嘅發現，唔單止可以為研究歐亞草原青銅時代晚期墓葬形制、喪葬思想提供實證，而且仲可以為研究中國滑冰起源帶嚟難得嘅實物資料。
原圖嚟自網絡