繼續同史友們介紹我國最新考古發現,繼早前考古團隊喺江蘇省蘇州市元和塘古窯遺址發現大量文物後,經過專家研究同分析後,終於就確定到呢個遺址正正就係南宋平江官窰,阿史今次就同大家講一講啦!
早前考古團隊就從遺址出土大量遺物,唔少都係以燒造變形或殘破器物為主,當中就包括盆、燈盞、撲滿、缽、甑、鈴鐺、模具、瓷碗及建築構件等。據南宋禮制文獻《中興禮書》記載,宋高宗趙構於紹興13年郊祭期間,就曾使用平江官窰燒製嘅瓷器。咁到底平江官窰又係喺邊度呢?據專家表示,平江官窰正正就係位於今日嘅蘇州,本來具體位置亦都唔知道,但根據今次出土嘅文物以及文獻證據,專家就認為元和塘古窯址出土陶器符合《中興禮書》關於「平江官窰」嘅論述,並且更加可以喺宋代官方燒造禮器圖冊《宣和博古圖》及《三禮圖》當中,搵到與之相應嘅器物,所以呢個遺址就可以確認為南宋平江官窰,真係一個有趣嘅過程。
原圖嚟自網絡