東南亞一帶聚居咗唔少華人，佢哋祖先都係從中國南下到當地生活。可能史友們會有一個認知，就係有華人生活响外國，都會有唐人街或者華埠。咁柬埔寨又有無唐人街呢？
响廣義而言，柬埔寨算係有唐人街，因為响金邊有一個華人聚居嘅社區，但又有啲人認為柬埔寨嚴格上係無歷史悠久嘅唐人街。
响晚清民國時期，好多嚟自福建、廣東嘅中國人去東南亞謀生，其中一個地方就係今日嘅柬埔寨。而响當地最大城市金邊，當時華僑就集中住响烏亞西市場同當時菜園區附近嘅紅土路一帶。不過，响上世紀七十年代，紅色高棉統治柬埔寨時期實行排華政策，當時政府禁止華人企業營運，華文文化被完全禁止同摧毀，大批華人離開咗呢個國家，亦因為咁，所以呢個地方就無一條歷史悠久嘅唐人街或華埠。
不過自上世紀八九十年代，柬埔寨政局穩定，好多至今老華僑同後代又聚集返响呢個地方，有華人聚居同好多華人商店，所以有人就指呢度係柬埔寨金邊嘅唐人街，據《世界著名華人街區——唐人街》作者一書，就明確有篇章形容「金邊唐人街」係「潮州華胞佔主體的唐人街」。不過，由於規模無其他外國個啲華埠咁有規模，所以就有人認為柬埔寨唔算正式有唐人街，就係咁解。
無論如何，隨住近年愈來愈多中國人去呢個國家發展，以華人聚居嘅小社區開始出現，除咗金邊外，西哈努克港（西港）亦出現華人社區，有啲人仲話個度係「西港唐人街」，阿史記得有一個去咗個邊嘅中學同學影咗張當地港式茶記嘅相，似乎真係唔少中國人去咗個邊搵食。
原圖嚟自網絡